EDWARDS, WILLIAM (1790 - 1855), ' Gwilym Callestr ' (ond y mae'n llawer mwy hysbys dan yr enw ' Wil Ysgeifiog'), bardd

Ganwyd mewn bwthyn o'r enw Plas Iolyn, Caerwys. Saer melinau oedd with ei grefft, ond yr oedd yn ddyn diarhebol wlyb - fe gofir y disgrifiad doniol ohono gan 'Talhaiarn' (Gwaith, ii, 200-2). Bu mewn gwallgofdy fwy nag unwaith, ac yng ngwallgofdy Dinbych y bu farw. Ond yr oedd yn fardd digon sylweddol, ac yn enwedig yn englynwr da. Enillodd yn eisteddfod Biwmares, 1832, ar yr awdl (Seren Gomer, 1832, 312), ac yn yr Wyddgrug, 1823, ar yr englyn. Yn y gwallgofdy y sgrifennodd ei farwnad i ' Carnhuanawc,' 1853, a welir yn Golud yr Oes, 1863, 112-3. Y mae llawer o'i waith ar chwâl yn Seren Gomer, Yr Eurgrawn, Y Gwladgarwr, Y Geninen, a'r Cymru (O.M.E.). Cyhoeddodd gyfrol, Cell Callestr (Trefriw, 1815), o'i waith ef ei hun ac eraill. Rhoes ' Talhaiarn ' a ' Chaledfryn ' garreg ar ei fedd yn Ysgeifiog. Ni wyddys union ddydd ei eni na'i farw.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Charles Ashton, Hanes llenyddiaeth Gymreig o 1651 O.C. hyd 1850 (1893) 596
• Cymru (O.M.E.), xviii, 302

Darllen Pellach

• Erthygl Wicipedia: William Edwards

Dolenni Ychwanegol

• Wikidata: Q18535598

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/