ELLIS, WILLIAM ('Gwilym ab Elis '; 1752 - 1810), emynydd a baledwr, o'r Bala;

Ganwyd yn Tynant, plwyf Llanycil, mab Ellis a Jane William. Ellen oedd enw'i wraig, a thrigent yn nhreddegwm Ismynydd yn 1780; ganwyd pedwar o blant iddynt rhwng 1780 a 1790. Bu farw Rhagfyr 1810, a'i gladdu yn Llanycil. Ef a gyhoeddodd Ychydig o Hymnau, etc. (d.d.) o waith Edward Parry, Llansannan, William Evans o'r Bala, ac eraill. Argraffwyd y llyfr 'tros ddyn tlawd a elwir William Ellis.' Y mae nifer o emynau o'i eiddo yn ail ran y llyfr. Bernir mai ef yw'r ' Gwilim ab Elis ' a gyhoeddodd gasgliad o emynau yn Nhrefeca yn 1786, Ychydig o Hymnau a Chaniadau Newyddion, etc. Y mae 25 o emynau yn y casgliad, ac un ohonynt yw'r emyn adnabyddus, ' Pan fu fy Arglwydd mawr yn llawr y bedd.' Ceir carol a cherdd yn y casgliad uchod, a nodir dwy faled o'i eiddo, c. 1790, yn rhestr J. H. Davies.

Awdur

• Y Parchedig Gomer Morgan Roberts, (1904 - 1993)

Ffynonellau

• Y Traethodydd, 1874, 483
• J. H. Davies, A Bibliography of Welsh Ballads printed in the 18th century (London 1908-11), 144
• cofrestr Llanycil

Dolenni Ychwanegol

• Wikidata: Q20734604

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/