EVANS, THOMAS (1625 - 1688), gweinidog gyda'r Bedyddwyr

Ganwyd yn y Pentre, Llanafanfawr, sir Frycheiniog. Cafodd addysg dda. Rhoes y dirprwywyr dystysgrif pregethwr iddo 16 Mai 1653. Gofalodd am eglwys blwyf Maesymynys hyd 1662. Bedyddiwr rhydd-gymunol ydoedd - dyna pam yr ymunodd ei ferch â Broadmead ac nid â'r Bedyddwyr Cyffredinol ym Mryste. Nid ef, fel y tybia 'Spinther,' eithr Thomas Evans, Dyffryn-ffrwd, aelod yn Llantrisant, oedd yng nghymanfa Aberafan (1654). Er ei garcharu yn Aberhonddu o dan Siarl II, a'i flino'n enbyd, aeth dau o'i fechgyn a llu o'i ddisgynyddion i'r weinidogaeth - y prifathrawon Hugh a Caleb Evans, Bryste, Dr. John Evans, Islington, etc. (gweler dan eu henwau). Bugeiliai ei breiddiau yn y Pentre a'r cylchoedd hyd ei farwolaeth yn 1688.

Awdur

• Y Parchedig William Joseph Rhys, (1880 - 1967)

Ffynonellau

• J. Spinther James, Hanes y Bedyddwyr yn Nghymru, ii, 431
• T. Richards, Trafodion Cymdeithas Hanes Bedyddwyr Cymru
• W. J. Rhys, Penodau yn Hanes y Bedyddwyr Cymreig (1949), tt. 56-57
• T. Richards, Religious Developments in Wales, 1654–1662 (1923)
• T. Richards, Wales under the Indulgence

Dolenni Ychwanegol

• Wikidata: Q20734447

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/