GRUFFUDD ab ADDA ap DAFYDD (fl. 1340-1370), llenor

Yr oedd yn gyfoeswr ac yn gyfaill i Dafydd ap Gwilym a ganodd farwnad iddo, lle y ceir rhai manylion amdano. Yr oedd yn frodor o Bowys Wenwynwyn, a lladdwyd ef gan ei gâr yn Nolgellau, lle y claddwyd ef. Ceir cyfeiriadau at ei farddoniaeth ym Mynegai Jones a Lewis; gweler hefyd Brogyntyn MS. 2 yn y Llyfrgell Genedlaethol. Y mae ei waith yn cynnwys rhai o'r ychydig enghreifftiau o ryddiaith y 14eg ganrif sydd ar gael, sef ' Breuddwyd Gruffudd ab Adda ' (a argraffwyd gan ' Gweirydd ap Rhys ' yn ei Hanes Llenyddiaeth Gymreig a chan Penar Griffiths yn Rhyddiaith Gymreig), a ' Trwstaneiddrwydd Gruffudd ab Adda ap Dafydd ' (a argraffwyd yn Y Cydymaith Diddan, 1766). Yr oedd hefyd yn gerddor, ac argraffwyd ei ' Gainc Ruffudd ab Adda ' yn y The Myvyrian Archaiology of Wales .

Yn yr ail arg. o D.G.G. 1935, dangosir nad y bardd oedd y gwr a fu farw tua 1344, ond gwr arall - amdano gweler D.G.G. 2, xc-xci, a dechrau'r ysgrif ' Wynn, Pryse, a Corbet,'. Cred Syr Ifor Williams fod y bardd wedi blodeuo rhwng 1340 a 1380.

Awdur

• Walter Thomas Morgan, (1912 - 1990)

Ffynonellau

• Ifor Williams a Thomas Roberts (goln), Cywyddau Dafydd ap Gwilym a'i Gyfoeswyr, 1935, lxxxix

Darllen Pellach

• Erthygl Wicipedia: Gruffudd ab Adda ap Dafydd

Dolenni Ychwanegol

• Wikidata: Q18535645

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/