JONES, EDWARD (1782 - 1855), '3ydd,' gweinidog Wesleaidd

Ganwyd yn Llantysilio-yn-Iâl yn 1782. Perthynai'n wreiddiol i'r Methodistiaid Calfinaidd, ond troes at y Wesleaid; dechreuodd bregethu yn 1805, ac anfonwyd ef yn genhadwr i Ferthyr Tydfil; efo oedd y pregethwr Wesleaidd Cymraeg cyntaf (1808) i gael ei osod yn Llundain. Teithiodd yn ddyfal bron ar hyd ei oes. Bu farw yn Llanidloes, 22 Gorffennaf 1855, yn 73 oed.

Sgrifennodd lawer i'r Eurgrawn, a bu'n olygydd iddo, 1829-35; cyhoeddodd gasgliad o emynau, a chyfieithiad, 1833, o bregethau John Wesley. Eithr fel dadleuydd diwinyddol y gwnaeth ei brif enw. Yn 1812, cyfieithodd lyfr Thomas Oliver, Cyflawn Wrthbrawf i'r Athrawiaeth o Barhad Diammodol mewn Gras; yn 1819 cyhoeddodd Amddiffynydd y Gwir, yn ateb i bamffledyn gan John Parry o Gaerlleon Fawr, 1818; ac yn 1829 neu 1830 Lladmerydd - a atebwyd yn bur ffyrnig gan Edward Jones o Faes-y-plwm yn ei Gwialen i Gefn yr Ynfyd, 1831. Bu iddo hefyd ran yn nadleuon mewnol ei gyfundeb - gweler pen. vi o A. H. Williams, Welsh Wesleyan Methodism, ac ymhellach t. 230.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Y Bywgraffydd Wesleyaidd yn cynwys bras-hanes am un a thriugain o weinidogion Wesleyaidd Cymreig yn nghyda 35 o weinidogion a gwyr lleyg Saesonig (Machynlleth 1866)
• Owen Thomas, Cofiant y Parchedig John Jones, Talsarn: mewn cysylltiad a hanes duwinyddiaeth a phregethu Cymru (Wrexham 1874), 338-42, 356-60
• A. H. Williams, op. cit. (mynegai)
• Catalogue of Printed Literature in the Welsh Department, Cardiff Free Libraries (1898)

Dolenni Ychwanegol

• Wikidata: Q20732959

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/