MORGAN, THOMAS REES (1834 - 1897), peiriannydd, gwneuthurwr peiriannau, a dyfeisydd

Ganwyd 31 Mawrth 1834, ym Mhenydarren, Merthyr Tydfil. Bu'n gweithio mewn gweithydd haearn nes iddo, yn 10 oed, gael damwain a gollodd iddo ei goes chwith y tu isaf i'r pen-glin. Bu wedyn o dan addysg yn ysgolion John Thomas ('Ieuan Ddu'), Owen Evans, a Taliesin Williams ('Taliesin ab Iolo'); o dan yr olaf dysgodd fathemateg ac elfennau mecaneg. Bu wedyn yn gweithio yn y gweithydd haearn lleol. Ymfudodd i U.D.A. yn 1865 a sefydlu yn Pittston, Pa., gan weithio yn siopau-gwaith cwmnïau rheilffyrdd. Bu wedyn yn y Cambria Iron Works (Johnstown) ac yn yr Atlas Works, Pittsburgh. Yn 1868 dechreuodd ei fusnes ei hun gan wneuthur morthwylion a weithir gan ager; o'r cychwyn syml hwn y datblygodd gwaith mawr y Morgan Engineering Company a chwmnïau eraill. Daeth ei ffyrm yn ymgymerwr mawr, gan wneuthur llawer o waith i'r Llywodraeth, yn enwedig i'r llynges. Ei ddyfais ef a'i gwnaeth yn bosibl i blygu a ffurfio'r platiau dur mawr at longau rhyfel. Bu farw 6 Medi 1897 yn Alliance, Ohio.

Awdur

• Robert (Bob) Owen, (1885 - 1962)

Ffynonellau

• The Cambrian, 1891, 289-93; 1897, 441-4
• Y Drych (Utica), 26 Tachwedd 1891
• Ebenezer Edwards, Welshmen as Factors in the Formation and Development of the United States Republic (Utica 1899), 295-8
• The Royal blue book prize productions of the Pittsburgh International Eisteddfod, July 2, 3, 4 and 5, 1913 (Pittsburgh 1916) (Pittsburgh International Eisteddfod, 2-5 Gorffennaf 1913), 1916, 174-5

Dolenni Ychwanegol

• Wikidata: Q20734524

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/