OWEN, JOHN (1616 - 1683), diwinydd Piwritanaidd (Annibynnwr)

'Gyda Baxter a Howe, saif ar flaen y diwinyddion Piwritanaidd'. Ganwyd yn 1616, a bu farw 24 Awst 1683. Adroddir ei yrfa'n llawn yn y D.N.B., ond nid oes a fynno hi ddim â Chymru, ond yn yr ystyr mai ar weithiau diwinyddol John Owen y magwyd cenedlaethau o bregethwyr Calfinaidd enwocaf Cymru. Ond yr oedd gwaed Cymreig ynddo. Mab oedd ef i Henry Owen, ficer Stadhampton (swydd Rhydychen), ŵyr felly i Griffith Owen o Dal-y-bont a Pheniarth (Llanegryn, Meirion), a gor-ŵyr i'r barwn Lewis Owen. Yr oedd hefyd yn perthyn i Hugh Owen (1639-1700) o Fronclydwr - yn gefnder cyfan i'w fam (gweler J. E. Griffith, Pedigrees, 323). Brodiwyd braidd yn ffansïol ar y ffaith hon gan rai a fyn mai dylanwad personol ei 'ewythr' a droes Hugh Owen yn Ymneilltuwr, yn ystod ei breswyl yn Rhydychen. Eithr nid aeth Hugh Owen yno cyn canol 1660, pan oedd John Owen eisoes wedi ymado â'r lle. Nid oes yn wir mo'r praw lleiaf fod unrhyw gyfathrach rhwng y diwinydd mawr a'i deulu yng Nghymru. Eto, yn ddiamau, fe wyddai Ymneilltuwyr yng Nghymru am y berthynas - cyfeirir ati gan Henry Maurice.

Awdur

• Yr Athro Emeritus Robert Thomas Jenkins, (1881 - 1969)

Delweddau

• John Riley, James Caldwall, John Owen D.D.
• Edward Scriven, John Owen D.D.
• John Whessell, Dr. John Owen
• R. Cooper, George Vertue, John Owen

Dolenni Ychwanegol

• VIAF: 2480434
• Wikidata: Q268474

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/