PARRI, HARRI ('Harri Bach o Graig-y-gath '; 1709? - 1800), bardd a chlerwr

Dywedir ei eni yng Nghraig-y-gath, Llanfihangel-yng-Ngwynfa, Sir Drefaldwyn, yn 1709. Llifiwr coed oedd i ddechrau, ond treuliodd y 30 mlynedd olaf o'i oes yn clera gan ganu carolau o'i waith ei hun ar hyd y ffeiriau. Cyfansoddai garol Mai newydd bob blwyddyn, yn adrodd helyntion hynotaf y flwyddyn flaenorol, a dechreuai ei chanu yn Ebrill. Mynychai'r mân eisteddfodau ac y mae rhai o'i englynion ar gael yn yr almanaciau, eithr ychydig o'i waith a argraffwyd. Araf ac afrwydd oedd ei awen; nid oedd yn ddigon ffraeth i ateb ' Twm o'r Nant ' mewn ymryson. Dyn bychan, diniwed, ydoedd, a thybiai am ei eni y flwyddyn y bu farw Huw Morys mai arno ef y disgynnodd mantell ' Eos Ceiriog.' Gellid tybio oddi wrth ei englynion yn Almanac Gwilym Howell, 1774, ei fod yn casáu'r Methodistiaid a'r Anghydffurfwyr.

Dywedir mai yn Llanfyllin y bu farw, mewn dygn dlodi, yn 90 oed. Claddwyd ef ym mynwent Llanfihangel-yng-Ngwynfa 15 Tachwedd 1800.

Awdur

• Dr Enid Pierce Roberts

Ffynonellau

• Almanac Siôn Prys (1744)
• Almanac W. Hywel (Llanidloes 1773)
• Bye-Gones, relating to Wales and the Border Counties, 1881, 239
• R. Ellis (Cynddelw), Manion Hynafiaethol, neu, Loffyn o hen gofion Cymruaidd, 42-3
• Y Geninen (Gŵyl Dewi), 1887, 75
• Y Geninen, 1886, 65
• Y Gwyliedydd, 1883, 153
• R. Williams, Montgomeryshire Worthies (1894), 235

Darllen Pellach

• Erthygl Wicipedia: Harri Parri (Harri Bach o Graig-y-gath)

Dolenni Ychwanegol

• Wikidata: Q28361205

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/