PARRY, HENRY (1766? - 1854), clerigwr a hynafiaethydd

Ganwyd c. 1766, mab Henry Parry, Brynllech, Llanuwchllyn. Cafodd ei addysg yng Ngholeg Iesu, Rhydychen (ymaelodi 1 Mehefin 1786, yn 20 oed; B.A. 1790). Bu'n ficer Llanasa, Sir y Fflint, am gyfnod hir, sef o 1798 hyd 1854; gwnaethpwyd ef yn un o ganoniaid Llanelwy ar 3 Mai 1833. Yr oedd yn flaenllaw fel eisteddfodwr (gweler Seren Gomer, 1834, 212, am ei hanes yn llywyddu mewn eisteddfod beirdd yn Nhreffynnon, 3 Mehefin 1834) ac fel hynafiaethydd (gweler marw-goffa byr yn Archæologia Cambrensis, 1855, 58). Golygodd ail argraffiad (Rhydychen, 1809) gramadeg y Dr. John Davies o Fallwyd a gyhoeddasid gyntaf yn 1621; sylwer fod argraffiad Parry ar werth gan Broster a Poole yng Nghaer a chan Carnes yn Nhreffynnon. Y mae rhai llythyrau a ysgrifennodd wedi eu cadw yng nghasgliadau Edward Jones (' Bardd y Brenin '), Thomas a David Pennant, a Walter Davies ('Gwallter Mechain') yn Ll.G.C.; e.e. NLW MS 165C , NLW MS 1807E , NLW MS 1893E , NLW MS 2590E , NLW MS 2591E , NLW MS 4877E a NLW MS 4878E . Bu farw 17 Rhagfyr 1854.

Awdur

• Syr William Llewelyn Davies, (1887 - 1952)

Ffynonellau

• H. B. Thomas, A History of the Diocese of St. Asaph (1874)
• Foster, Mynegai i 'Composition Books' yr esgobion yn y P.R.O. Y mae'r mynegai gwreiddiol yntau yn y P.R.O., ond y mae copïau ar gael, e.e. yn NLW MSS 1626–7C. Cyhoeddwyd rhan o'r mynegai, am y cyfnod 1800–40, yn Index Ecclesiasticus, 1890
• ibid., Alumni Oxonienses: the members of the University of Oxford

Dolenni Ychwanegol

• Wikidata: Q5726737

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/