PRYSE, JOHN (1826 - 1883), argraffydd a chyhoeddwr llyfrau

Ganwyd yn 1826 yn sir Faesyfed, ond yn Llanidloes, Sir Drefaldwyn, y treuliodd y rhan fwyaf o'i oes. Prentisiwyd ef yn grydd ond yn gynnar ymsefydlodd yn nhref Llanidloes fel gwerthwr llyfrau, ac yn ddiweddarach fel argraffydd. Ymddiddorai yn llenyddiaeth a hanes Cymru, a chyhoeddodd nifer mawr o adargraffiadau o lyfrau Cymreig, yn eu plith: Specimens of ancient Welsh poetry (Evan Evans), View of the primitive ages (Theophilus Evans), Causes of dissent in Wales (A. J. Johnes). Efe hefyd a gyhoeddodd Llyfryddiaeth y Cymry (W. Rowlands), a nifer o lyfrau o'i waith ei hun: Pryse's Welsh Interpreter, Breezes from the Welsh mountains, Cydymaith i'r Almanaciau, Pryse's handbook to the Radnorshire and Breconshire mineral springs. Yn 1859 cychwynnodd y Llanidloes and Newtown Telegraph, papur wythnosol, yr ail a gyhoeddwyd yn Sir Drefaldwyn. Bu'n briod ddwywaith, ei wraig gyntaf yn weddw Richard Mills, y cerddor. Bu farw 19 Hydref 1883.

Awdur

• Idwal Lewis

Ffynonellau

• R. Williams, Montgomeryshire Worthies (1894)
• T. Mordaf Pierce, Y Parchedig Humphrey Gwalchmai, y bugail cyntaf un Nghyfundeb y Methodistiaid Calfinaidd gyda threm ar hanes dechreuad yr Achos yn nosbarth Llanidloes (1908)

Gweithiau

• John Pryse, James Rhys Jones a R. Richardson, Pryse's handbook to the Breconshire and Radnorshire mineral springs: with notes and excerpts illustrating the history, antiquities, and topography of many of the surrounding towns and villages (Llanidloes 1860)
• John Pryse, Pryse's handbook to the Breconshire and Radnorshire mineral springs: with various descriptive journeys and excursions therefrom to numerous places of interest in central Wales (Llanidloes 1870)

Dolenni Ychwanegol

• Wikidata: Q20733619

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/