ROGERS, JOHN (bu farw 1738), gwerthwr llyfrau ac argraffydd yn Amwythig;

Mab Reynold Rogers, groser, Llundain. Efallai ei fod yn fab i Gabriel Rogers (bu farw 1705), a oedd yntau yn werthwr llyfrau yn Amwythig. Dechreuodd argraffu tua 1706, ac y mae'n bosibl mai ei lyfr cyntaf oedd A Sermon preach'd at the Funeral of … James Owen, Minister of the Gospel in Shrewsbury. April the 11th, 1706. By Matthew Henry, 1706?. Yn 1707 cyhoeddodd ddau lyfr Cymraeg : Egwyddorion y Grefydd Gristianogawl a Godidawgrwydd Rhinwedd, yn 1708 argraffodd almanac - Cennad oddiwrth y Ser, ac yn 1714 argraffiad o Dirgelwch, sef llyfr mwyaf adnabyddus Morgan Llwyd o Wynedd. Un faled Gymraeg o'i wasg a gofnodir gan J. H. Davies (Bibliog. of Welsh Ballads). Ymddengys iddo barhau i argraffu hyd 1729 o leiaf. Bu Nicholas Thomas yn dysgu ei grefft yn swyddfa John Rogers neu yn swyddfa Shôn Rhydderch. Claddwyd un ' John Rogers, Bookseller,' 9 Mai 1738.

Awdur

• Syr William Llewelyn Davies, (1887 - 1952)

Ffynonellau

• At y ffynhonnell a nodwyd ychwaneger Llewelyn C. Lloyd, 'The Book-Trade in Shropshire,' yn Transactions of the Shropshire Archaeological and Natural History Society, 1935 a 1936 (lle y ceir llawer o fanylion am wahanol aelodau teuluoedd o'r cyfenw Rogers)

Dolenni Ychwanegol

• Wikidata: Q20804730

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/