TUDUR, EDMWND (c. 1430 - 1456)

Tad Harri VII - mab hynaf Owain Tudur a Chathrin de Valois, gweddw Harri V. Er mwyn gwybod amgylchiadau priodas ei rieni, gweler yr erthygl ar Owain Tudur. Cafodd ei fagu yn Lloegr, o dan nawdd Harri VI, ei hanner brawd, a'i gwnaeth yn iarll Richmond yn 1452-3. Ni fu unrhyw gysylltiad cydrhwng Edmwnd a Chymru hyd ar ôl iddo ymbriodi â'r arglwyddes Margaret Beaufort, merch John Beaufort, arglwydd Somerset, ond y mae'r ffaith iddo farw yng Nghaerfyrddin ar 3 Tachwedd 1456 yn awgrymu iddo gael ei fwriadu ar gyfer gyrfa weinyddol yng Nghymru, fel ei frawd Siaspar Tudur, ar ei ôl. Claddwyd ef yn nhŷ'r Brodyr Llwydion yng Nghaerfyrddin a symudwyd ei weddillion i eglwys gadeiriol Tyddewi adeg diddymiad y mynachlogydd. Ganwyd ei fab, ail iarll Richmond, a ddaeth wedi hynny yn frenin cyntaf y Tuduriaid, ar ôl marwolaeth ei dad. Canodd Lewis Glyn Cothi a Dafydd Nanmor alarnadau i Edmwnd.

Awdur

• Yr Athro Thomas Jones Pierce, (1905 - 1964)

Ffynonellau

• Oxford Dictionary of National Biography
• Archaeologia Cambrensis, III, xv, 394
• Gwaith Lewis Glyn Cothi (Oxford 1837), 492
• Thomas Roberts ac Ifor Williams (goln), The Poetical Works of Dafydd Nanmor (Caerdydd 1923), 34-6, 41-2
• Howell T. Evans, Wales and the Wars of the Roses (Cambridge 1915)

Darllen Pellach

• Erthygl Wicipedia: Edmwnd Tudur

Delweddau

• LlGC: Margaret, Countess of Richmond and Derby who built St. Winifride's crypt and chapel

Dolenni Ychwanegol

• Wikidata: Q361204

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/