WILLIAMS, EDMUND (1717 - 1742), un o emynwyr cynnar y diwygiad Methodistaidd

Brodor o Gwm Tyleri, sir Fynwy, ac un o ddychweledigion Howel Harris ar ei daith bregethu gyntaf yn sir Fynwy - Mawrth ac Ebrill 1738. Eglwyswr ydoedd, o deulu da ac yn dda ei fyd. Cafodd addysg dda. Yr oedd yn ŵr defosiynol ac o dan ddylanwad Harris daeth yn 'gynghorwr mawr ei barch ymysg y Methodistiaid.' Cyhoeddodd ef a'i gyfaill Morgan John Lewis, yntau yn gyd-ddychweledig ag ef, gasgliad o emynau Cymraeg a argraffwyd gan S. Mason, Pontypŵl, yn 1741. Cyhoeddwyd, wedi ei farw, gasgliad arall o'i emynau - gan Felix Farley, Bryste, y tro hwn. Dywed Edmund Jones, Y Tranch, Pontypŵl, iddo gyhoeddi hefyd 'rywbeth yn erbyn dawnsio.' Bu farw yn Ebrill a'i gladdu 17 Ebrill 1742.

Awdur

• Arthur Gray-Jones

Ffynonellau

• Edmund Jones, A geographical, historical and religious account of the parish of Aberystruth in the county of Monmouth to which are added memoirs of several persons of note who lived in the said parish (Trefeca 1779)
• dyddiaduron Howel Harris
• W. Rowlands, Llyfryddiaeth y Cymry (Llanidloes 1869), 388

Dolenni Ychwanegol

• Wikidata: Q20751800

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/