WILLIAMS, ROBERT HERBERT ('Corfanydd '; 1805 - 1876), cerddor

Ganwyd ym mhlwyf Bangor, Sir Gaernarfon. Symudodd y teulu i fyw i Lerpwl pan oedd ef yn fachgen. Dygwyd ef i fyny yn ddilledydd, a chadwai siop yn Basnett Street ar gongl Williamson Square, Lerpwl. Adwaenir ' Corfanydd ' fel cerddor oddi wrth ei dôn ' Dymuniad,' M.S. Dywed iddo ei chyfansoddi ar ei ffordd adref o'i waith, yn 1822; canwyd hi gyntaf dan arweiniad William Evans yng nghapel y Tabernacl, a daeth yn boblogaidd. Ymddangosodd y dôn gyntaf yn Y Drysorfa, Ionawr 1835, dan yr enw ' Deisyfiad ' gydag 'R.W. Liverpool,' ac wedi hynny yn Casgliad o Donau (J. Ambrose Lloyd), 1843. Darfu i eraill geisio ei hawduriaeth, ond yn Y Cerddor Cymreig 1866 a 1868 cafwyd tystiolaeth ' Ieuan Gwyllt,' J. Ambrose Lloyd, y Parch. William Ambrose, a William Evans, mai ' Corfanydd ' oedd ei hawdur. Cyfansoddodd amryw donau, a chyhoeddodd gasgliad bychan o donau dan yr enw Alawydd Trefriw yn 1848. Symudodd o Lerpwl i Drogheda, Iwerddon, am rai blynyddoedd, ond daeth yn ôl, ac oherwydd afiechyd ymneilltuodd i fyw i'r Corfandy, Porthaethwy, ac yno y bu farw 20 Tachwedd 1876; claddwyd ym mynwent Llantysilio.

Awdur

• Robert David Griffith, (1877 - 1958)

Ffynonellau

• M. O. Jones, Bywgraffiaeth Cerddorion Cymreig (1890)
• Y Cerddor Cymreig (1861-1873), 1866 a 1868
• Y Cerddor, Mai 1893

Dolenni Ychwanegol

• VIAF: 88461565
• Wikidata: Q28361519

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/