JONES, JOHN ROBERT ('Alltud Glyn Maelor '; 1800 - 1881), llenor ac emynydd

Ganwyd yn Llanarmon yn Iâl yn 1800; yr oedd yn perthyn i ' Ehedydd Iâl ' (William Jones, 1815 - 1899). Prentisiwyd ef yn grydd, a bu'n grydd hyd ei flynyddoedd diwethaf. Priododd (cafodd chwe mab), ac aeth i fyw i'r Cefnmawr, lle yr ymunodd (1827) â'r Bedyddwyr. Symudodd i'r Brymbo yn 1834, a bu yno weddill ei oes. Cynullwyd eglwys i'r Bedyddwyr, yn ei dy, yn 1836 - ar gyfer yr achlysur hwnnw y lluniodd ei emyn adnabyddus ' Cofio 'rwyf yr awr ryfeddol.' Nid oedd yn dda ei fyd tua diwedd ei ddyddiau, ond cafodd waith ysgafn yng ngwaith haearn Brymbo. Bu farw 11 Mai 1881.

Sgrifennodd lawer i gyfnodolion ei enwad, a chyhoeddwyd dau lyfr o'i eiddo, Y Fodrwy Arian, 1877, a Y Rhosyn Diweddaf, 1889 (wedi ei farw). Canodd farwnadau i Christmas Evans a John Williams (1806 - 1856), llawer o garolau, a swm mawr o ganeuon ysgeifn ar destunau ysmala. Arferai argraffu emynau byrion ar gardiau, a'u gwerthu am geiniog neu ddwy yr un.

Mab iddo oedd William Jones, Abergwaun (1834 - 1895).

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• E. K. Jones yn Trafodion Cymdeithas Hanes Bedyddwyr Cymru, 1942, 33-44

Darllen Pellach

• Erthygl Wicipedia: John Robert Jones (Alltud Glyn Maelor)

Dolenni Ychwanegol

• VIAF: 139162062
• Wikidata: Q20733640

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/