WILLIAMS, WILLIAM JONES (1891 - 1945), diwygiwr, gweinidog Apostolaidd

Brawd Daniel Powell Williams a'i gydymaith fel proffwyd ar ei deithiau; ganwyd yn Garn-foel 9 Mai 1891. Yn ddeg oed dechreuodd fynychu cyfarfodydd diwygiad, ac mewn cyfarfod yng nghapel (MC) Llanllian arddododd Evan Roberts a'r Dr D. M. Phillips eu dwylo arno gan ddymuno yr arweinid ef i'r weinidogaeth. Fel y gwelwyd uchod, galwyd ef i'r swydd broffwydol yn yr Eglwys Apostolaidd, a bu ar deithiau gyda'i frawd i lawer gwlad, a hefyd ar ei ben ei hun. Bu'n bugeilio preiddiau ym Mhen-y-groes, Bradford, Llandybïe, Caerdydd, a'r eglwys Apostolaidd yn Edgware, Llundain. Ef am flynyddoedd oedd is-olygydd yr Apostolic Herald, cylchgrawn cenhadol yr eglwys, a sefydlwyd yn 1922 fel yr Apostolic Church Missionary Herald ond yn 1931 newidiwyd y teitl.

Priododd (1) â Mary Anne Evans o Landeilo yn 1912; a bu iddynt 3 phlentyn. Bu hi farw 15 Tachwedd 1936, ac yn 1938 priododd yntau (2) ag Elsi, merch John a Rachel Evans, Capel Isaac, a bu iddynt un ferch. Bu yntau farw 15 Ebrill 1945, yn Llundain a chladdwyd ef ym mynwent y Deml, Pen-y-groes.

Awdur

• Evan David Jones, (1903 - 1987)

Ffynonellau

• Thomas Napier Turnbull, Brothers in Arms (1963)
• Thomas Napier Turnbull, What God hath wrought A short history of the Apostolic Church (1959)
• Rees Evans, Precious jewels from the 1904 revival in Wales
• Tom H. Williams, Mining to ministering
• Riches of Grace

Dolenni Ychwanegol

• Wikidata: Q20821241

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/