Fe wnaethoch chi chwilio am Sir William Williams, 1st Baronet, of Gray
Ganwyd ef ar 16 Mawrth 1933, yn fab i'r ffermwr David Maelor Hooson ac Ursula Ellis Hooson ei wraig. Roedd yn gefnder i Emlyn Hooson (ganwyd 1925), y cyn-Aelod Seneddol Rhyddfrydol dros sir Drefaldwyn, 1962-79, ac yn or-nai i Thomas Edward Ellis (1859-1899), yr AS Rhyddfrydol dros sir Feirionnydd, 1886-99, a'r bardd Cymraeg I. D. Hooson (1880-1948). Addysgwyd ef yn Ysgol Ramadeg y Rhyl a Choleg y Brifysgol, Rhydychen (lle graddiodd yn MA. Galwyd ef i'r bar o Gray's Inn, ac yna enillodd ei fywoliaeth fel newyddiadurwr ar y Times. Gwasanaethodd yn swyddog gweithredol i Gwmni Prentis a Varley, 1958-61, ac i gwmni Benton a Bowles, 1961-76, lle daeth yn is-lywydd hŷn â chyfrifoldeb dros weithgareddau yn Ewrop. Aeth y gwaith hwn ag ef i'r Unol Daleithiau ac i Ffrainc. Hooson oedd sylfaenydd Welsh Farm News ym 1957, a bu'n gadeirydd ar y Bow Group, 1960-61, corff y teimlai ymrwymiad arbennig iddo, a Crossbow. Bu'n is-lywydd ar Ffederasiwn Cymdeithasau Ceidwadol ac Undebol y Brifysgol, 1960-61. Roedd ei yrfa mewn hysbysebu, cyhoeddi a marchnata yn arbennig o lwyddiannus.
Safodd Tom Hooson yn ymgeisydd dros y Ceidwadwyr yn etholaeth sir Gaernarfon yn etholiad cyffredinol 1959 pan wrthwynebodd Goronwy O. Roberts, yr AS Llafur dros yr etholaeth. Ar wahoddiad personol arweinydd ei blaid Margaret Thatcher, derbyniodd Hooson y swydd o Gyfarwyddwr Cyfathrebu dros y Blaid Geidwadol ym 1976, a pharhaodd yn y swydd honno am ddwy flynedd. Daeth wedyn yn Gyfarwyddwr Cyffredinol Cymdeithas Cyhoeddwyr Cylchgronau ym 1978. Cipiodd sedd Brycheiniog a Maesyfed dros y Ceidwadwyr yn etholiad cyffredinol 1979 a daliodd ei afael ynddi hyd at ei farw ar 8 Mai 1985 yn ei gartref yn Chelsea, Llundain, ar ôl brwydro'n hir yn erbyn cancr. Roedd yn dal i weithio, yn llofnodi llythyrau i'w etholwyr, o fewn ychydig oriau i'w farwolaeth. Cynhaliwyd ei wasanaeth angladdol yn Eglwys Gadeiriol Aberhonddu. Roedd amryw yn ei ystyried yn un swil ac yn un a weithredai ar ei liwt ei hun yn San Steffan. Ond rhoddai sylw'n arbennig i anghenion uniongyrchol ei etholwyr ac enillodd barch fel AS da dros ei etholwyr. Yn yr is-etholiad a ddilynodd ei farwolaeth, Richard Livsey a'r Democratiaid Cymdeithasol a gipiodd y sedd. Cyhoeddodd ar y cyd Work for Wales (1959) a chyfrannodd at Lessons from America (1970). Ei hobïau oedd cerdded, hwylio, tennis a darllen. Ni fu erioed yn briod.
Dyddiad cyhoeddi: 2008-08-01
Hawlfraint Erthygl: http://rightsstatements.org/page/InC/1.0/
Mae'r Bywgraffiadur Cymreig yn cael ei ddarparu gan Lyfrgell Genedlaethol Cymru a Chanolfan Uwchefrydiau Cymreig a Cheltaidd Prifysgol Cymru. Mae ar gael am ddim ac nid yw'n derbyn cymorth grant. Byddai cyfraniad ariannol yn ein helpu i gynnal a gwella'r wefan er mwyn i ni fedru parhau i gydnabod Cymry sydd wedi gwneud cyfraniad nodedig i fywyd yng Nghymru a thu hwnt.
Ewch i'n tudalen codi arian am ragor o wybodaeth.