DAFYDD, RICHARD WILLIAM (fl. 1740-52), cynghorwr Methodistaidd

Brodor o Landyfaelog, Sir Gaerfyrddin, a brawd i David Williams, Llyswyrny. Dywedir iddo bregethu ym Môn yn 1740 a chael triniaeth arw yno. Gwyddys yn sicr ei fod yn cynghori yn 1742, a phenodwyd ef yn sasiwn Llanddeusant, 1743, i arolygu seiadau yn Sir Gaerfyrddin. Cymerth ran yng ngwrthryfel John Richard Llansamlet, yn erbyn trefniadau'r sasiwn yn 1743, ac ysgrifennwyd ato i'w ddarbwyllo gan Whitefield a Howel Harris. Penodwyd ef yn ymwelydd seiadau Gorseinon a Phenbre yn 1744. Gwyddys ei fod yn Llandyfaelog yn 1744, a chyfarfu Thomas William ag ef yno yn 1747. Cawn ef yn pregethu yn Nhrefeca yn 1752 a dyna'r olwg olaf arno. Ymddengys iddo ymsefydlu yn Abertawe, a bu'n gefn i'r seiat fore yn y dref.

Awdur

• Y Parchedig Gomer Morgan Roberts, (1904 - 1993)

Ffynonellau

• H. Bevan, Ychydig hanes neu goffadwriaeth am amryw bethau neillduol a gymmerasant le ymhlith corph y Methodistiaid Calfinaidd yn ac o'u dechreuad, sef oddiar yr amser y daeth Mr. Howel Harries i bregethu yn ei droion cyntaf i amryw barthau o Sir Forganwg a'i chyffiniau (Abertawe 1838), 7
• John Pritchard, Methodistiaeth Môn (1888), 23
• Methodistiaeth Cymru (1851–6), i, 115; iii, 29
• J. Morgan Jones a W. Morgan, Y Tadau Methodistaidd (1895-1897), i, 212
• R. Bennett, Methodistiaeth Trefaldwyn Uchaf, 1738–1852 (1929), 224
• Cylchgrawn Cymdeithas Hanes y Methodistiaid Calfinaidd, xxi, 74; xxv, 52: xxvii, 15, 140
• Joseph Evans, Biographical Dictionary of Ministers and Preachers of the Welsh Calvinistic Methodist Body … to the close of the year 1850 (1907), 29
• T. Beynon, Treftadaeth y Cenfu a Maes Gwenllian (1941), 121

Dolenni Ychwanegol

• Wikidata: Q20734306

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/