DAVIES, REUBEN ('Reuben Brydydd y Coed'; 1808 - 1833), bardd ac ysgolfeistr

Ganwyd 1808, mab i 'Dafydd y Gwehydd a Beti ' o Danrallt, Cribin, Sir Aberteifi. Bu yn yr ysgol yng Nghribin ac Ystrad dan y Parch. T. J. Griffiths ('Tau Gimel a'r Parch. Rees Davies, Ystrad. Yr oedd ei fryd ar y weinidogaeth Undodaidd, a derbyniwyd ef i Goleg Caerfyrddin yn 1825, ond pallodd ei iechyd ac ni bu yno ond amser byr. Bu yn ysgolfeistr yng Nghribin, ac, yn ystod blynyddoedd olaf ei oes, yng Nghilmaenllwyd, Caerfyrddin. Cyfieithodd lawer o weithiau awduron Groeg a Rhufain i'r Gymraeg, yn enwedig gweithiau Ovid. Yr oedd copi gwreiddiol o'i weithiau ym meddiant y Parch. Rees Jenkin Jones, Aberdâr, ac y mae copi ohonynt gan y Parch. D. Evans, y Cribin. Cyfansoddodd dros 50 o emynau, a safai yn uchel ym marn Daniel Evans ('Daniel Ddu') fel emynydd. Heblaw'r emynau gadawodd ar ei ôl ddarn o farddoniaeth - 'Dydd Barn' - ynghyd a chaneuon, nifer o englynion, ac awdl goffa i'r Parch. D. L. Jones (Glynadda) o Goleg Caerfyrddin. Bu farw 8 Ionawr 1833 yn 25 mlwydd oed, a gorwedd ym mynwent eglwys Dihewyd.

Awdur

• Y Parchedig Thomas Oswald Williams, (1888 - 1965)

Ffynonellau

• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), i, 153
• Yr Ymofynnydd, 1833, 234
• Enwogion Ceredigion (1869), 28-9
• E. Pan Jones, Oriel Coleg Presbyteraidd, Caerfyrddin: yn cynwys hanes yr holl fyfyrwyr fu yn y coleg o 1796 hyd 1899 (Merthyr Tydfil 1909), 46

Dolenni Ychwanegol

• Wikidata: Q20734218

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/