GWERFUL MECHAIN (1462? - 1500), bardd

Y cwbl a wyddys amdani yw mai merch Hywel Fychan o Fechain ym Mhowys oedd hi, ac ategir hynny yng nghywydd Dafydd Llwyd yn danfon Llywelyn ap y Gutun yn llatai ati. Gwyddys fod darnau o'i chywyddau yn nofio ar gof gwlad yn y 19eg ganrif, oblegid cyfeiria ' Ap Vychan ' a Syr Owen M. Edwards at hynny. Cymysgir rhyngddi â Gwerful, ferch Madog o Fro Danad, yn Eminent Welshmen ac Enwogion Cymru; nid i Werful Mechain y farddes y canodd Guto'r Glyn. Pa fodd bynnag, ni wyddys ond y nesaf peth i ddim amdani. Un yn canu yn ôl ffansi'r foment oedd Gwerful Mechain; canodd gywydd gwych i'r Iesu yn ei ddioddefaint; lluniodd ambell englyn trawiadol, cynhyrfodd wrth wragedd eiddigus a beirdd gwawdlyd cyffelyb, fel Ieuan Dyfi, Llywelyn ap Gutun, a hynny'n finiog-fras hefyd.

Awdur

• Leslie Harries, (1901 - 1988)

Ffynonellau

• Leslie Harris, 'Barddoniaeth Huw Cae Llwyd' (traethawd anghyhoeddedig, 1933, yn Ll.G.C.)

Darllen Pellach

• Katie Gramich (gol.), The works of Gwerful Mechain (Broadview Press 2018)
• Lauren Cocking, On the Gleefully Indecent Poems of a Medieval Welsh Feminist Poet, Literary Hub, (cyrchwyd Awst 2019)
• Erthygl Wicipedia: Gwerful Mechain

Dolenni Ychwanegol

• Wikidata: Q5623555

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/