JONES, WILLIAM COLLISTER (1772 - ?), argraffydd yng Nghaer

Bedyddiwyd 12 Gorffennaf 1772, mab William a Sarah Jones, Caer. Ceir ef a Thomas Crane yn argraffu llyfrau Cymraeg yng Nghaer o c. 1796 ymlaen. Yn 1798 dechreuasant gyhoeddi llyfrau crefyddol dros Thomas Charles, Bala, a Thomas Jones, Dinbych; cyn diwedd 1798, fodd bynnag, enw W. C. Jones yn unig a geir; e.e. T. Charles, Hanes Fer o For-Daith y Llong Duff. Bu'n argraffu Trysorfa Ysbrydol o 1799 hyd 1802. Prentis yn swyddfa Crane a Jones yng Nghaer oedd y Robert Saunderson a ddechreuodd argraffu dros Thomas Charles a Thomas Jones yn y Bala yn 1803; prentisiaid eraill oedd Thomas Gee a John Broster. Y mae'n debygol i W. C. Jones beidio ag argraffu llyfrau Cymraeg tua'r flwyddyn 1807.

Awdur

• Syr William Llewelyn Davies, (1887 - 1952)

Ffynonellau

• Morris Parry, 'Chester Welsh Printing' yn Journal of the Architectural, Archaeological and Historic Society of Chester and North Wales, 1913
• Morris Parry, Gwasg Gymraeg Caerlleon (Caerlleon 1931)
• Ifano Jones, A history of printing and printers in Wales to 1810, and of successive and related printers to 1923 (Cardiff 1925)

Gweithiau

• Hugh Jones, Hymnau newyddion: ynghyd ag ychydig benhillion ar yr amserau; a rhai gwersi o erfyniad am ddiogelwch i Frydain (Caerlleon 1797)
• Thomas Edwards, Cân ar berson Paris, neu, Rynniau'r Iwerddon (Caerlleon 1802)

Dolenni Ychwanegol

• Wikidata: Q20734581

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/