LLYWELYN GOCH Y DANT (fl. 1470-1), bardd

a gysylltir yn arbennig â Sir Forgannwg. Cymerodd blaid beirdd Tir Iarll yn yr ymryson a gododd oddi ar farwnad Hywel ap Dafydd ap Ieuan ap Rhys i Ieuan ap Hywel Swrdwal tua 1470, ac yn ei gywydd yn y gyfres hon ('Mae yn y tir myn y tân') enwa wyth o feirdd cyfoes, a'i gyfrif ef ei hun, ym Morgannwg. Canodd foliant Syr Rhoser Fychan, Tre Tŵr (' Syr Rhoser piler pob haelioni ') pan oedd hwnnw yn ei anterth, a'i farwnad ('Torrodd fraint cywraint ceyrydd') pan ddienyddiwyd ef gan Siaspar Tudur, iarll Penfro, yng Nghasgwent yn 1471. Cynnwys y farwnad ymosodiad ffyrnig ar Siaspar. Canodd hefyd awdl ar fesurau go anghyffredin i fynachlog Nedd ('Naddwyd nid crefft anweddus'). A dyna'r cyfan o'i waith a gadwyd. Disgrifir ef mewn cywydd gan Ieuan Du'r Bilwg ('y nithwraig ar y noethwraidd') fel pencerdd a ' phen prydydd ar gywydd gŵr.' Awgryma Lewis Glyn Cothi mewn cywydd i Siôn ap Dafydd iddo dreulio llawer o'i amser yng Nghilfai (Gwaith, 108).

Awdur

• Evan David Jones, (1903 - 1987)

Ffynonellau

• N.L.W. Llawysgrif Gwysaney yn Llyfrgell Genedlaethol Cymru, Aberystwyth 38
• G. J. Williams, Traddodiad Llenyddol Morgannwg (1948), 37-8

Darllen Pellach

• Erthygl Wicipedia: Llywelyn Goch y Dant

Dolenni Ychwanegol

• Wikidata: Q18535792

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/