MEREDITH, THOMAS (fl. 1747-70), cynghorwr Methodistaidd, ac Antinomiad

Hanoedd o Lanbrynmair, ond trigai yng Nghoed-y-rhos, Mochdref, Sir Drefaldwyn. Enwir ef yn gynghorwr yn sasiwn y Tyddyn, 1747. Perthynai i blaid Howel Harris yn 1750, ond trowyd ef allan yn 1751. Dywedir iddo ŵyro at Antinomiaeth a mynd o dan ddylanwad Thomas Sheen. Dychwelodd i'w gynefin a llwyddodd i ennill rhai canlynwyr. Cyhoeddwyd casgliad o'r eiddo yn 1770 allan o waith William Erbury a Morgan Llwyd, etc., sef A Scourge for the Assirian the great Oppressor (W. Laplain, Salop). Ceir ei olygiadau mewn llyfr a gyhoeddwyd yn 1770 ar ôl ei farw (o'r un wasg), sef An Illustration of Several Texts of Scripture, sy'n cynnwys rhai o'i lythyrau. Ceir elfen gyfriniol yn ei waith, a thuedd at ddaliadau'r hen heretigiaid ' Monophysitaidd. '

Awdur

• Y Parchedig Gomer Morgan Roberts, (1904 - 1993)

Ffynonellau

• Robert Jones (Rhoslan), Drych yr Amseroedd (Trefriw 1820), 136, 143
• Methodistiaeth Cymru (1851–6), i, 409; ii, 241, 324, 377
• J. Gwili Jenkins, Hanfod Duw a Pherson Crist: athrawiaeth y Drindod a Duwdod Crist, yn bennaf yn ei pherthynas â Chymru (Liverpool 1931), 140
• R. Bennett, Methodistiaeth Trefaldwyn Uchaf, 1738–1852 (1929), 79, 183, 187-9
• W. Rowlands, Llyfryddiaeth y Cymry (Llanidloes 1869), 518
• R. Williams, Montgomeryshire Worthies (1894), 195

Dolenni Ychwanegol

• Wikidata: Q20734505

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/