MORRIS, JOHN (1706 - 1740), morwr

mab ieuengaf Morris ap Rhisiart Morris, a brawd i Lewis, Richard, a William Morris (gweler yr ysgrifau arnynt); ganwyd yn 1706. Ni wyddys fawr ddim amdano, fwy nag a geir mewn ysgrif (ar ei frawd Lewis) yn y Cambrian Register, 1796, 232, a ddywed iddo farw ar fwrdd y llong-ryfel Torbay (yn y cyrch aflwyddiannus ar Cartagena) yn 1740, yn 34 oed - yr oedd yn ' master's mate ' ar y llong. Y mae gennym ryw 22 o'i lythyrau, tt. 6-36 o'r Morris Letters, yn ymestyn o 5 Gorffennaf 1739 hyd 22 Medi 1741. Gwyddom ei fod gyda'i frawd Richard yn Llundain yn 1735, ac y mae gan Richard (1734) englyn yn ei ganmol yn fawr am ei fwynder (Llawysgrif Richard Morris o Gerddi, tt. cix, cxi).

Awdur

• Yr Athro Emeritus Robert Thomas Jenkins, (1881 - 1969)

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/