PRICHARD, THOMAS JEFFERY LLEWELYN (bu farw 1875?), actiwr ac awdur

Ganwyd ym mhlwyf Trallong, sir Frycheiniog. Gwyddys iddo gymryd rhan mewn dramâu a chwaraeid gan actorion crwydrol yn Aberystwyth ac yn Aberhonddu (e.e. 1841); dywedir hefyd iddo fod am gyfnod yn catalogio llyfrau Lady Llanover (Lady Hall y pryd hwnnw) yn ei chartref hi yn sir Fynwy. Y gwaith y cysylltir ei enw ag ef fynychaf erbyn hyn yw The Adventures and Vagaries of Twm Shôn Catti , a gyhoeddwyd gyntaf yn Aberystwyth ('Printed for the Author by John Cox ') yn 1828. Cafwyd llawer o argraffiadau wedi hynny - yn yr ail (y Bont-faen) ceir rhagair gan yr awdur wedi ei ysgrifennu yn Llanfairmuellt a chyfeiriadau ynddo at William Owen Pughe, David Owen ('Brutus'), a W. J. Rees, Cascob; o Lanidloes y daeth y trydydd argraffiad (awdurdodedig) yn 1871, yn cael ei ddilyn gan argraffiad Cymraeg o'r un argraffwasg, 1872, y cyfieithiad gan 'Eilonydd,' sef John Evans. Cyhoeddodd Prichard y gweithiau hyn hefyd - Welsh Minstrelsy … or Cantrev y Gwaelod. A Poem (Aberystwyth, 1824), The New Aberystwyth Guide (Aberystwyth, 1824), The Cambrian Balnea: or Guide to the Watering Places of Wales, Marine and Inland (London, 1825), gydag argraffiad arall o hwn o dan yr enw The Llandrindod Guide (d.d.), The Heroines of Welsh History (London, 1854). Golygodd The Cambrian Wreath: A Selection of English Poems on Welsh Subjects (Aberystwyth, 1828), gan gyfrannu iddo beth o'i waith ei hun. Ymddengys iddo farw mewn tlodi, yn Abertawe, efallai yn 1875 neu 1876; yn ôl Cyfaill yr Aelwyd , 1887 (113 ) claddwyd ef yno ym mynwent capel y Tabernacl. Roedd yn dal yn fyw ar 24 Tachwedd 1875, dyddiad llythyr ganddo a argraffwyd yn Cymru Fu, II, v, 80.

Awdur

• Syr William Llewelyn Davies, (1887 - 1952)

Ffynonellau

• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• Bye-Gones, relating to Wales and the Border Counties, 1881, 347; 1882, 34
• Poole, The Illustrated History and Biography of Brecknockshire (1886), 317

Darllen Pellach

• Erthygl Wicipedia: Thomas Jeffery Llewelyn Prichard

Gweithiau

• T. J. Llewelyn Prichard, The adventures and vagaries of Twm Shon Catti, descriptive of life in Wales (Aberystwyth 1828)
• T. J. Llewelyn Prichard, Difyr-gampau a gorchestion yr enwog Twm-Shôn-Catti, gwron Cymreig (Bala 188-?)
• T. J. Llewelyn Prichard, Edward Salter, The adventures and vagaries of Twm Shon Catti: alias Thomas Jones, Esq. of Tregaron, a wild wag of Wales (Llanidloes 1873)

Dolenni Ychwanegol

• Wikidata: Q20804793

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/