PRYDYDD BYCHAN, Y, o Ddeheubarth (fl. 1220-70), bardd

Ceir yn llawysgrif Hendregadredd ac yn The Myvyrian Archaiology of Wales dros 20 cyfres o englynion o'i waith, a'r rheini gan amlaf i ddisgynyddion yr arglwydd Rhys, a mân benaethiaid a swyddogion yn Nyfed, Ystrad Tywi, a Cheredigion. Sonnir am frwydro yn Rhos a Phenfro yn fwyaf arbennig. Eto ceir ganddo englynion i Owain Goch a ganwyd rhwng 1244 a 1254 tra oedd Owain yn rhydd. Canodd farwnad i Rys Ieuanc (bu farw 1222), i Rys Gryg (bu farw 1234), i Owain fab Gruffudd ap Rys (bu farw 1236), ac englynion moliant a marwnadol i Faredudd fab Owain (bu farw 1265). Gan fod gwaith y Prydydd Bychan yn dilyn gwaith ei gyfoeswr, Phylip Brydydd, yn y llawysgrifau, a'r ddau yn canu i'r un tywysogion, hawdd yw eu cyplysu, ac y mae'n dra thebyg mai'r Prydydd Bychan yw'r ' Gwilym ' y sonia Gwilym Ddu o Arfon amdano (The Myvyrian Archaiology of Wales , 277b); ' Da oedd rhwng caeroedd Ceredigion rym / Phylip a Gwilym aethlym wythlawn.' Byddai hynny yn ei gysylltu â Cheredigion, ac y mae'n sôn am Lanarth, Gwynionydd, Ystrad Fflur, a Charon. Yn The Myvyrian Archaiology of Wales , 357b, rhoir i Ddewi Mynyw yr englynion i Rys Gryg a briodolir i'r Prydydd Bychan yn The Myvyrian Archaiology of Wales , 262b.

Awdur

• David Myrddin Lloyd, (1909 - 1981)

Ffynonellau

• The Myvyrian archaiology of Wales (Denbigh 1870), 259a-266a
• Archifau LlGC: NLW MS 6680B: Llawysgrif Hendregadredd, 92a-97b
• J. Lloyd-Jones, The Court Poets of the Welsh Princes
• J. Vendryes yn Études Celtiques, iii, 1938, 274-334

Darllen Pellach

• Rhian M. Andrews (gol.), Gwaith Bleddyn Fardd a beirdd eraill ail hanner y drydedd ganrif ar ddeg (Caerdydd 1996)
• Erthygl Wicipedia: Y Prydydd Bychan

Dolenni Ychwanegol

• Wikidata: Q3324139

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/