ROWLAND, NATHANIEL (1749 - 1831), clerigwr Methodistaidd

Ganwyd ym mhersondy Llangeitho, mab Daniel Rowland. Addysgwyd ef yn Christ Church, Rhydychen; graddiodd yn B.A., 1771, ac M.A., 1774. Urddwyd yn ddiacon yn Rhydychen, 26 Mai 1771, ac yn offeiriad yn Llundain 21 Medi 1773. Bu'n gurad Stock (Essex) o 1771 hyd ei briodas yn 1776 a Margaret, merch Howel Davies, ac aeth i fyw i'r Parcau, Henllan Amgoed, ar ffiniau Caerfyrddin a Phenfro.

Methodist oedd, fel ei dad, ac ymddengys iddo wasnaethu fel ysgrifennydd y sasiwn yn 1778-97. Bu'n gefn am flynyddoedd i Fethodistiaid Sir Benfro; bugeiliodd y seiadau a ffurfiwyd gan ei dad-yng-nghyfraith; gofalai hefyd am y Tabernacl, Hwlffordd. Galwodd William Williams Pantycelyn arno i gymryd lle ei dad fel arweinydd y sasiwn, a chymerth ran flaenllaw yn niarddeliad Peter Williams.

Ei fai pennaf oedd balchter, a'i duedd oedd tra-awdurdodi ar ei frodyr. Diarddelwyd yntau, am feddwdod, yn sasiwn Castellnewydd Emlyn yn 1807. Bu farw 8 Mawrth 1831, a'i gladdu yn Henllan Amgoed. Argraffwyd ei ewyllys yn Cylchgrawn Cymdeithas Hanes y Methodistiaid Calfinaidd, 1954, 11-13.

Awdur

• Y Parchedig Gomer Morgan Roberts, (1904 - 1993)

Ffynonellau

• Foster, Alumni Oxonienses: the members of the University of Oxford
• W. Williams, Marwnad er Coffadwriaeth am Farwolaeth y Parchedig Mr. Daniel Rowlands yr hwn a ymadawodd a'r byd Hydref 16, 1790, yn 77 mlwydd o'i oed ac a gladdwyd yn Llangeitho (Merthyr 1828)
• Cylchgrawn Cymdeithas Hanes y Methodistiaid Calfinaidd, vii, 48; xi, 43-65
• Joseph Evans, Biographical Dictionary of Ministers and Preachers of the Welsh Calvinistic Methodist Body … to the close of the year 1850 (1907), 288
• Y Brython, 1862, 32
• Methodistiaeth Cymru (1851–6), i, 418, 445
• J. Morgan Jones a W. Morgan, Y Tadau Methodistaidd (1895-1897), ii, 326-8
• Gomer M. Roberts, Bywyd a Gwaith Peter Williams (Caerdydd 1943), 87-92, 97
• Cylchgrawn Cymdeithas Hanes y Methodistiaid Calfinaidd, 1960, 60-6, 69-70

Gweithiau

• Nathaniel Rowland, Statement of the case between the Rev. Mr. Rowland and the Tabernacle Congregation at Haverford-west (Haverfordwest? 1791)

Dolenni Ychwanegol

• Wikidata: Q20751819

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/