SAUNDERS, EVAN (bu farw 1742), diacon

Diacon ffyddlon a medrus yn yr eglwys Fedyddiedig yn y Coedgleision, Betws Bledrws; symudwyd yr eglwys honno i'w dŷ ef yn Aberduar ar ymadawiad Enoch Francis y gweinidog i fyw i ardal Castellnewydd Emlyn tua 1730. Dechreuodd bregethu ar farwolaeth y gweinidog yn 1740, ond bu yntau farw yn 1742.

DAVID SAUNDERS 'I' (bu farw 1812), gweinidog

Mab iddo, a godwyd i bregethu yn yr eglwys yn 1764 a'i ordeinio'n gyd-weinidog â Zecharias Thomas a David Davies yng ngwanwyn 1771. Ond gweinidogaeth drafferthus a gafodd yno. Sonnir am yr aelodau ym Methel, Caeo, yn diflasu arno ac yntau'n cytuno i wasnaethu'r canghennau eraill, a dywedir iddo ymuno â'r Bedyddwyr Cyffredinol, er nad oes sôn iddo gymryd gofal eglwys. Bu farw yng nghartref ei frawd Thomas Saunders yn Undergrove, Llanbedr-Pont-Steffan, 26 Ebrill 1812, yn 81 oed. Cyhoeddodd Antigraphon; neu Wrthargraphiad Sion, yn achos y Cam-achwyniad a gafodd … mewn Llyfr Newydd, a elwir Amddiffyniad o'r Eglwys Grist'nogol, yn bedyddio Plant Bychain, 1780, a Marwnad, 1791, i William Williams, Pantycelyn.

Nai iddo, a mab Thomas Saunders, oedd David Saunders 'II', gweinidog capel Seion, Merthyr.

Awdur

• Benjamin George Owens

Ffynonellau

• Hanes y Bedyddwyr ymhlith y Cymry: o amser yr Apostolion, hyd y flwyddyn hon: yn ddwy ran (Caerfyrddin 1778) (arg. 1885), 385, 518, 522, 526, 539
• David Jones, Hanes y Bedyddwyr yn Neheubarth Cymru (1839), 130, 133, 327, 329
• Archifau LlGC: NLW MS 10785C
• W. Rowlands, Llyfryddiaeth y Cymry (Llanidloes 1869), 600, 658
• Trafodion Cymdeithas Hanes Bedyddwyr Cymru, 1930, 52; 1942, 16

Dolenni Ychwanegol

• Wikidata: Q20733042

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/