VAUGHAN, JOHN ('Siôn Grythor'; bu farw 1824), arlunydd a ffidler

Dywed W. Davies Leathart yr arferai ganu'r ffidil yng nghyfarfodydd Cymdeithas y Gwyneddigion, Llundain, tua'r flwyddyn 1776. Paentiodd ddarlun o Owen Jones ('Owain Myvyr'). Bu farw 1824 mewn oedran mawr.

Brawd iddo oedd WILLIAM VAUGHAN, brodor o Gonwy, un o aelodau cynharaf y Gwyneddigion. Dywed Leathart yr edrychid arno fel 'a dandy of the first order, a distinction he was not a little proud of,' ac ychwanega ei fod yn berthynas i'r arglwyddes Mostyn, mam y Syr Thomas Mostyn a fu farw yn 1831. Margaret, merch ac aeres Hugh Wynn, Ll.D., Bodysgallen a Berthddu, oedd yr arglwyddes Mostyn hon; yr oedd hi yn aeres Bodysgallen (gerllaw Conwy), Plasmawr (Conwy), Bodidris (sir Ddinbych), a Chorsygedol (Sir Feirionnydd). Bu William Vaughan farw yn Hammersmith c. 1827, yntau hefyd mewn oedran mawr.

Awdur

• Syr William Llewelyn Davies, (1887 - 1952)

Ffynonellau

• Leathart, Origin and Progress of the Gwyneddigion Society of London (London 1831) (London, 1831)
• M. O. Jones, Bywgraffiaeth Cerddorion Cymreig (1890)
• Y Cymmrodor, 1951, 96, 117

Dolenni Ychwanegol

• Wikidata: Q28361495

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/