DWNN, OWAIN (c. 1400 - c. 1460),

Modlyscwm, Cydweli. Ei daid oedd yr Henry Don a fu'n cynorthwyo Owain Glyn Dŵr (Lloyd, Owen Glendower, 41). Enwir Owain Dwnn yn fynych mewn dogfennau rhwng 1436 a 1446. Chwaer iddo oedd Mabli, gwraig gyntaf Gruffydd ap Nicholas o Ddinefwr, a charcharwyd Owain a Gruffydd fel canlynwyr i Humphrey, dug Caerloyw, ustus De Cymru, pan fachludodd haul hwnnw yn 1447. Y mae tystiolaeth (Panton MS. 40 (83)) iddo wasanaethu yn Iwerddon o dan Richard, dug Efrog, tad Edward IV, ac iddo ef, efallai, y canodd Hywel Dafydd gywydd sy'n llawn cyfeiriadau at y gwasanaeth hwnnw. Gwraig Owain oedd Catherine, merch John Wogan o Bictwn, Sir Benfro, a mab iddynt oedd yr Harri Dwnn a laddwyd, gyda'i gefnder o'r un enw, ym mrwydr Hedgecote Field, Gorffennaf 1469.

Enwir Owain Dwnn fel bardd yn bennaf ar sail yr 'englynion a fu rhwng Gruffudd ap Nicholas ag Owain Dwnn a Gruffudd Benrhaw ' (y mae'r testun hynaf ohonynt yn NLW MS 3039B (59-78)), ond anodd barnu eu dilysrwydd. Priodolir un englyn proest i Owain Dwnn, hefyd, yn NLW MS 3039B (510).

Awdur

• Garfield Hopkin Hughes, (1912 - 1969)

Ffynonellau

• Trafodion Anrhydeddus Gymdeithas y Cymmrodorion, 1941, 120-31

Dolenni Ychwanegol

• Wikidata: Q19513574

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/