EDWARDS, JOHN ('Siôn y Potiau '; c. 1700 - 1776)

Ganwyd yn Glyn Ceiriog - efallai mai ef yw'r John mab Edward Jones a fedyddiwyd yno 27 Rhagfyr 1699. Cofnodir claddu 'John Edwards the Welsh Poet' yn Llansantffraid Glyn Ceiriog, 28 Rhagfyr 1776, a dywedir bod ei gartref am gyfnod yn ymyl y fynwent. Adroddir iddo adael ei grefft fel gwehydd yn fuan ar ôl priodi a threulio saith mlynedd yn Llundain fel cynorthwywr i lyfrwerthwr - y mae'r ymryson a fu rhyngddo a Jonathan Hughes yn ategu hyn. Mab iddo oedd Cain Jones yr almanaciwr, a gwneir yntau hefyd yn almanaciwr gan Charles Ashton ac eraill. Yr oedd yn un o feirdd eisteddfodau 'r 18fed ganrif - y Bala 1738, Glyn Ceiriog 1743, ' Slattyn ' 1748, etc. - a nodau beirdd yr eisteddfodau sydd ar lawer o'i gerddi, yn arbennig ar ei gyfansoddiad enwocaf, y 24 englyn i glochdy eglwys Llangollen, 1749. Lluniodd gyfieithiad o'r ail a'r drydedd ran o'r Pilgrim's Progress. Cyhoeddwyd yr ail ran gan Stafford Prys - yn 1761-2, mae'n debyg, a barnu oddi wrth 'Rybudd' y cyfieithydd (168), ac nid yn 1767 fel y dywed William Rowlands ('Gwilym Lleyn'). Argraffwyd y drydedd ran 'tros Ddafydd Llwyd o'r Bala ' yng Nghaerlleon yn 1768 - enwir Robert Llwyd o'r Bala yn yr ail ran fel cyfaill i'r cyfieithydd. Hwn oedd y cyfieithiad Cymraeg cynharaf o'r drydedd ran.

Awdur

• Garfield Hopkin Hughes, (1912 - 1969)

Ffynonellau

• Y Tyst Apostolaidd, v, 1850, 136
• W. Rowlands, Llyfryddiaeth y Cymry (Llanidloes 1869), 503
• Charles Ashton, Hanes llenyddiaeth Gymreig o 1651 O.C. hyd 1850 (1893), 338, etc.
• J. H. Davies, A Bibliography of Welsh Ballads printed in the 18th century (London 1908-11)
• Almanac (1776, 1777, 1779, 1780), 1776, 1777, 1779, 1780
• Almanac (1740, 1743, 1744), 1740, 1743, 1744

Dolenni Ychwanegol

• Wikidata: Q6231366

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/