HARRIES (HARRIS, HARRY), JOHN (1722 - 1788), 'o Dreamlod,' cynghorwr bore gyda'r Methodistiaid Calfinaidd

Na chymysger ef â John Harris (1704 - 1763) 'o S Kennox'. Ac ystyried ei enwogrwydd, y mae'n syn mor ychydig yw'r ffeithiau pendant a wyddys amdano. Yr oedd â gofal seiadau yng ngogledd sir Benfro arno'n gynnar, a daeth yn ddeheulaw i Howell Davies; nid damwain yw'r ffaith mai ym mhlwyf Treamlod y mae Woodstock, capel cyntaf y Methodistiaid Calfinaidd yn y sir. Ar farwolaeth Howell Davies (1770), John Harries (ffermwr da ei fyd) oedd wrth lyw Methodistiaeth Dyfed nes daeth Nathaniel Rowland i gymryd gwaith Howell Davies drosodd. Yn ôl William Gambold, 'he was one of the strictest and most approved of men, universally beloved'; ac yr oedd gan Rowland Hill feddwl mawr ohono. Ymdrechodd yn galed i atal y llanw Morafaidd yn y sir: ceryddodd y Brodyr yn 1768 am 'ddwyn pobl Mr. Howell Davies,' ac edrydd y Morafiad Edward Oliver i Harries ymliw'n rymus ag ef yn 1770 'for coming among their people, as he called them' - serch i'r ddeuddyn gydletya yn Nhreddafydd ar ôl cydbregethu'n gyfeillgar ddigon 'in the Methodist Meeting House.' Bu farw yn Nhrefdraeth, 7 Mawrth 1788; yn ôl carreg ei fedd, yr oedd yn 66 oed. Bu iddo fab, EVAN HARRIES, a ddechreuodd gynghori yn 1784, ac a oedd yn un o'r 13 cynghorwyr o'r Deheudir a ordeiniwyd yn 1811; bu farw 1819. Daeth amryw o ddisgynyddion John Harries yn weinidogion.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Llawysgrifau yng nghronfa'r Morafiaid yn Hwlffordd
• Methodistiaeth Cymru (1851–6), ii, 303-9
• Cylchgrawn Cymdeithas Hanes y Methodistiaid Calfinaidd, iv, rhifynnau 1 a 2

Dolenni Ychwanegol

• Wikidata: Q20733135

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/