RHISIART FYNGLWYD, bardd (fl. 1510-70).

Mab Iorwerth Fynglwyd, ac athro cerdd i Ddafydd Benwyn. Fe'i gelwir hefyd wrth yr enw Rhisiart Iorwerth. Er bod cartref ei dad yn Saint-y-Brid, yr oedd Rhisiart yn byw yn Nhir Iarll. Canodd gywyddau serch yn ei ieuenctid, ac yna gerddi caeth o fawl ar yr hen fesurau i uchelwyr Morgannwg, Sir Gaerfyrddin, a sir Frycheiniog, yn bennaf. Ymhlith y cerddi hyn fe geir amryw i'r Dwniaid, ac yn arbennig i Ruffudd Dwnn o Ystrad Merthyr, a'i fab Harri. Yr oedd yn Ystrad Merthyr ar wyliau'r Sulgwyn 1531 a 1533, ac ar Ddydd Gŵyl Dewi, 1536 a 1537, ac ym mhlas Syr Siors Herbert yn Abertawe tua 1543. Dywaid G. J. Williams am ei waith: ' Efallai y mwyaf diddorol yw'r cywydd heddwch rhwng Syr Siors Herbert a Mr. Edward Mawnsel,' a hefyd mai Rhisiart Fynglwyd, a oroesodd Lewys Morgannwg, oedd yr ' olaf o feirdd pwysig y dalaith (sef Morgannwg) yng nghyfnod y canu caeth.'

Awdur

• David Myrddin Lloyd, (1909 - 1981)

Ffynonellau

• Marwnad gan Dafydd Benwyn yn Llyfr Hir Llanharan, 131a
• gwaith Rhisiart Fynglwyd mewn amryw o lawysgrifau yn Ll.G.C., yn arbennig Llanstephan MS 40: Poetry in praise of Gruffydd Dwnn
• Edward Lhuyd, Archaeologia Britannica (Oxford 1707), 263
• J. Gwenogvryn Evans, Reports on Manuscripts in the Welsh Language (Historical Manuscripts Commission 1898–1910), ii, 499, etc.
• G. J. Williams, Traddodiad Llenyddol Morgannwg (1948)

Darllen Pellach

• Erthygl Wicipedia: Rhisiart Iorwerth

Dolenni Ychwanegol

• Wikidata: Q20638154

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/