HUW CEIRIOG (fl. c. 1560-1600), bardd

Brodor o sir Ddinbych a raddiodd yn ddisgybl disgyblaidd cerdd dafod yn eisteddfod Caerwys, 1568 (Peniarth MS 132 (59)). Ceir peth o'i farddoniaeth mewn llawysgrifau, a hwnnw'n cynnwys cywyddau ysgafn i serch a natur, rhai eraill i Simwnt Thelwal o Blas y Ward, Sion Salbri o Lyweni (marwnad), ac un o fawl i Blas Moelyrch. Ceir hefyd englyn ganddo i'r eisteddfod a enwyd uchod. Cynnwys y llawysgrifau canlynol enghreifftiau o'i farddoniaeth: B.M. Add. MS. 14894, Cardiff MS. 63, Llanstephan MS 118 , NLW MS 3048D , NLW MS 6496C , NLW MS 8330B , Peniarth MS 84 (Llyfr Dafydd Cayo ), Peniarth MS 104 .

Enw Hywel Ceiriog a geir yn rhestr rhai llawysgrifau o raddedigion Caerwys yn 1568 (e.e. Peniarth MS 121 (215), Peniarth MS 144 (268)); ceir hefyd ymryson a fu rhwng Hywel Ceiriog, Wiliam Llŷn, Ieuan Tew, a Sion Phylip, a'r ddau fardd, Wiliam Cynwal a Huw Llŷn (NLW MS 3021F (455), NLW MS 675A (24b)). Nid ydys yn sicr eto ynghylch cysylltiad y ddau enw.

Awdur

• Ray Looker

Ffynonellau

• H. Blackwell, NLW MSS 9251-9277A: A Dictionary of Welsh Biography
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• 'Gweirydd ap Rhys,' Hanes Llenyddiaeth Gymreig, 1300–1650 (1885)
• William Owen Pughe, The Cambrian Biography (1803)

Darllen Pellach

• Erthygl Wicipedia: Huw Ceiriog

Dolenni Ychwanegol

• Wikidata: Q13129191

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/